2025 йил 26 февраль куни “Ўзбекэкспертиза” АЖ томонидан видеоконференция шаклида Қашқадарё вилояти тадбиркорлари иштирокида семинар ташкил этилди.

Мазкур тадбирда Ўзбекистон Республикаси Президентининг 2024 йил 14 мартдаги ПҚ-126-сонли ҳамда Вазирлар Маҳкамасининг 2024 йил 28 октябрдаги 712-сонли қарорларининг асосий мазмун ва моҳияти тушунтирилиб, лойиҳа офислари ва экспорт марказлари фаолиятлари ҳамда маҳаллий ишлаб чиқариш ва ташқи савдони ривожлантириш масалалари муҳокама қилинди.

Тадбирда маҳаллий ишлаб чиқарувчилар ва экспортчилар ўртасидаги ҳамкорликни яхшилаш, янги қувватларни ишга тушириш ва мавжудларни кенгайтириш ҳамда фаолиятлар давомида юзага келаётган муаммоларни ҳал этиш имкониятлари, шунингдек, товарларнинг келиб чиқишини тасдиқлаш ва сертификатлаш масалаларига алоҳида эътибор қаратилди.

Семинарда “Alp Texno Servis”, “Avtotraktorradiator”, “Dexkonobod Kaliy Zavodi”, “Uzbekistan Gtl”, “Kitob Mikrokalsit Zavod”, “Razata”, “Exim Asr Group”, “Lt Textile International”, “Sulton Tex Group”, “Kitob Ip Yigiruv”, “Radiant Silk”, “Sulton Styles”, “Yakkabog Standart Textile”, “Shahrisabz Textile”, “Imron Ibn Bahodir”, “Murodali Farm Tekstil”, “Shodlik” ва “Qashqadaryo Yong’indan Saqlash” каби тадбиркорлик субъектлари иштирок этди.

Семинар якунида иштирокчилар ўзларини қизиқтирган саволларга мутахассислардан аниқ ва тушунарли жавоблар олишди, бу эса уларга халқаро иқтисодий алоқалар доирасида ўз фаолиятларини самарали давом эттиришга ёрдам беради.

Шу билан бирга, иштирокчиларга жорий йилнинг 11 март куни Наманган вилоятида “Қишлоқ хўжалигида қайта тикланувчи энергия манбалари (ҚТЭМ) тизимларини жорий этиш истиқболлари” мавзусида бўлиб ўтилиши кутилаётган семинар бўйича маълумот берилди ҳамда “ZOOM” платформаси орқали иштирок этиш таклиф этилди.