"O‘zbekekspertiza" aktsiyadorlik jamiyatining yangi tarkibdagi Kuzatuv kengashining birinchi yig‘ilishi joriy yilning 23 iyul kuni bo‘lib o‘tdi.

Yig‘ilish kun tartibida O‘zbekiston Respublikasining “Aktsiyadorlik jamiyatlari va aktsiyadorlar huquqlarini himoya qilish to‘g‘risida”gi Qonuniga muvofiq Kuzatuv kengashi raisini saylash Jamiyat Ijroiya organining 2024 yil I yarim yillik faoliyati yakuni bo‘yicha hisobot va mazkur hisobot davridagi Ijroiya organi faoliyati samaradorligining muhim ko‘rsatkichlari (KPI) o‘rnatilgan tartibda ko‘rib chiqildi.

Yig‘ilishda Jamiyat Kuzatuv kengashi raisi etib O‘zbekiston Savdo-sanoat palatasi Raisi – Vahabov Davron Abdujalalovich saylandi.

Shuningdek Kuzatuv kengashi a’zolari etib quyidagilar belgilandi:
Axmedov Dilshod Tursunkulovich – O‘zbekiston Respublikasi Investitsiyalar sanoat va savdo vazirining o‘rinbosari;
Abidov Badriddin Nurutdinovich – O‘zbekiston Respublikasi Davlat aktivlarini boshqarish agentligi mas’ul xodimi;
Murodov Ulug‘bek Xoshimjonovich – Eksportni rag‘batlantirish agentligi direktori;
Qarayev Feruz Faxriddinovich – O‘zbekiston Respublikasi Davlat aktivlarini boshqarish agentligi bo‘lim boshlig‘i.

Shu bilan birga Jamiyat Ijroiya organining 2024 yil I yarim yillik faoliyati yakuni bo‘yicha hisobot eshitilib “O‘zbekekspertiza” AJning hisobot davridagi barcha asosiy moliyaviy ko‘rsatkichlari ijobiy baholandi.

Jamiyatning 2024 yil I yarim yillik faoliyati yakuni bo‘yicha hisoblangan Ijroiya organi faoliyati samaradorligini yigindi ko‘rsatkichlari koeffitsienti 1313 foizni tashkil etdi.

Kun tartibidagi har bir masala bo‘yicha tegishlicha muhokamalar olib borilib Kuzatuv kengashi a’zolari tomonidan Jamiyatni kelgusida yanada rivojlantirish va faoliyat samaradorligini oshirish yuzasidan zarur taklif va mulohazalar berildi.

Bundan tashqari yig‘ilishda O‘zbekiston Respublikasi Prezidentining «O‘zbekiston Respublikasi Prezidentining tadbirkorlar bilan ochiq muloqotini tashkil qilish chora-tadbirlari to‘g‘risida» 30.05.2024 yildagi PQ–200-sonli qaroriga asosan tadbirkorlar bilan Ochiq muloqotni tashkil qilish bo‘yicha “Call-markazlar” faoliyati natijalari to‘g‘risida ma’lumotlar berildi.

Shuningdek O‘zbekiston Respublikasi Prezidentining 2024 yil 14 martdagi PQ–126-son qaroriga asosan “O‘zbekekspertiza” AJ qoshida tashkil etilgan eksport markazlari faoliyati natijalari bilan tanishildi.

Yig‘ilish yakunida Kuzatuv kengashi Raisi D.Vahabov tomonidan Jamiyat faoliyatini yanada kengaytirish va rivojlantirish yuzasidan quyidagi taklif va ko‘rsatmalar berildi:

• Jamiyat moliyaviy resurslaridan oqilona foydalanish; 
• O‘zbekiston Respublikasi Prezidentining 2018 yil 29 iyundagi PQ–3818-son qarori ijrosini ta’minlash maqsadida Jamiyatda yangi tashkil etilgan Mahalliy ishlab chiqaruvchilarni qo‘llab-quvvatlash bo‘limi faoliyatini yo‘lga qo‘yish va respublikada importni tartibga solish bo‘yicha takliflar ishlab chiqish;
• eksport qiluvchi tadbirkorlik sub’ektlariga ko‘mak berish jahon bozoriga chiqishda va eksport ko‘lamini kengaytirishda amaliy va moddiy yordam berish uchun Jamiyat mablag‘laridan alohida FOND tashkil etish; 
• tadbirkorlar bilan Ochiq muloqotni tashkil qilish bo‘yicha “Call-markazlar” faoliyatini jadallashtirish;
• yirik eksportchi korxonalar ishtirokida davra suhbati tashkil etish;
• Jamiyatning har bir bo‘linmasi uchun alohida KPI joriy etish yo‘li bilan ularning daromadliligini oshirish;
• Eksport qiluvchilar uchun samarali va qulay bo‘lgan “Eksporter” yagona mobil ilovasini yaratish va joriy qilish; 
• Tadbirkorlarni qo‘llab-quvvatlash Loyiha ofislari tomonidan jurnalist va blogerlar bilan birgalikda tadbirkorlik sub’ektlarining eksport faoliyatiga to‘siq bo‘layotgan muammolarini hal etish jarayonlarini ijtimoiy tarmoqlarda va oynaijahonida keng yoritib borish masalasini ishlab chiqish;
• O‘zbekiston Respublikasi eksportyor korxonalarining mahsulotlarini xalqaro aloqalarni o‘rnatishning sodda, tezkor va qulay usulini taqdim etish va ularga jahon bo‘ylab savdo-sotiqni rivojlantirishga yordam berish maqsadida, O‘zbekiston Savdo-sanoat palatasi va “Uzbekekspertiza” AJ hamkorligida “O‘zbekiston Respublikasining eksportga yo‘naltirilgan mahsulotlari KATALOGI” ishlab chiqish, shu bilan birga, eksport qilinayotgan tovarlar TIF TN kodlari bilan aks ettirilishi hamda eksportyor haqidagi ma’lumotga QR kod orqali ham kirish imkoniyatini yaratish.