2024-yilning 3-iyun kuni Anqara shahrida “O‘zbekspertiza” AJ rahbariyati, tegishli boshqaruv mutaxassislari va Turkiya Savdo-sanoat palatalari va birjalar ittifoqi (TOBB) rahbariyati o‘rtasida uchrashuv bo‘lib o‘tdi.

Yig‘ilishda mazkur Ittifoq tomonidan ishlab chiqilgan va joriy qilingan MEDOS tizimi taqdimot qilindi. Ushbu tizim tekshirish va hujjatlarni rasmiylashtirish jarayonlarini avtomatlashtirish va soddalashtirish uchun moʻljallangan boʻlib, tovarlarning kelib chiqishi toʻgʻrisidagi imtiyozli va imtiyozsiz sertifikatlar hamda tashqi iqtisodiy faoliyat uchun zarur boʻlgan boshqa hujjatlarni rasmiylashtirish imkonini beradi.

Turkiya Savdo-sanoat palatalari va birjalar ittifoqi 2 millionga yaqin aʼzo korxona va 350 dan ortiq quyi palata va birjalarni birlashtirgan eng yirik notijorat va nodavlat tashkilotdir. Bundan tashqari, Ittifoq qoshida malakali kadrlar tayyorlaydigan oliy o‘quv yurti faoliyat ko‘rsatmoqda.

Turkiya Savdo-sanoat palatalari va birjalar ittifoqi bilan tajriba almashish “O‘zbekspertiza” AJ ga ilg‘or tajriba va texnologiyalarni joriy etish, baholash va sertifikatlash usullarini takomillashtirish, ko‘rsatilayotgan xizmatlar sifatini oshirish imkonini beradi.

"O'zbekekspertiza" AJ matbuot xizmati.